Genesis (Bereshit) Chapter 7 | Sacred Texts Archive

‎1 ‏וַיֹּ֤אמֶר יְהוָה֙ לְנֹ֔חַ בֹּֽא־אַתָּ֥ה וְכָל־בֵּיתְךָ֖ אֶל־הַתֵּבָ֑ה כִּֽי־אֹתְךָ֥ רָאִ֛יתִי צַדִּ֥יק לְפָנַ֖י בַּדּ֥וֹר הַזֶּֽה׃

‎2 ‏מִכֹּ֣ל׀ הַבְּהֵמָ֣ה הַטְּהוֹרָ֗ה תִּֽקַּח־לְךָ֛ שִׁבְעָ֥ה שִׁבְעָ֖ה אִ֣ישׁ וְאִשְׁתּ֑וֹ וּמִן־הַבְּהֵמָ֡ה אֲ֠שֶׁר לֹ֣א טְהֹרָ֥ה הִ֛וא שְׁנַ֖יִם אִ֥ישׁ וְאִשְׁתּֽוֹ׃

‎3 ‏גַּ֣ם מֵע֧וֹף הַשָּׁמַ֛יִם שִׁבְעָ֥ה שִׁבְעָ֖ה זָכָ֣ר וּנְקֵבָ֑ה לְחַיּ֥וֹת זֶ֖רַע עַל־פְּנֵ֥י כָל־הָאָֽרֶץ׃

‎4 ‏כִּי֩ לְיָמִ֨ים ע֜וֹד שִׁבְעָ֗ה אָֽנֹכִי֙ מַמְטִ֣יר עַל־הָאָ֔רֶץ אַרְבָּעִ֣ים י֔וֹם וְאַרְבָּעִ֖ים לָ֑יְלָה וּמָחִ֗יתִי אֶֽת־כָּל־הַיְקוּם֙ אֲשֶׁ֣ר עָשִׂ֔יתִי מֵעַ֖ל פְּנֵ֥י הָֽאֲדָמָֽה׃

‎5 ‏וַיַּ֖עַשׂ נֹ֑חַ כְּכֹ֥ל אֲשֶׁר־צִוָּ֖הוּ יְהוָֽה׃

‎6 ‏וְנֹ֕חַ בֶּן־שֵׁ֥שׁ מֵא֖וֹת שָׁנָ֑ה וְהַמַּבּ֣וּל הָיָ֔ה מַ֖יִם עַל־הָאָֽרֶץ׃

‎7 ‏וַיָּ֣בֹא נֹ֗חַ וּ֠בָנָיו וְאִשְׁתּ֧וֹ וּנְשֵֽׁי־בָנָ֛יו אִתּ֖וֹ אֶל־הַתֵּבָ֑ה מִפְּנֵ֖י מֵ֥י הַמַּבּֽוּל׃

‎8 ‏מִן־הַבְּהֵמָה֙ הַטְּהוֹרָ֔ה וּמִן־הַ֨בְּהֵמָ֔ה אֲשֶׁ֥ר אֵינֶ֖נָּה טְהֹרָ֑ה וּמִ֨ן־הָע֔וֹף וְכֹ֥ל אֲשֶׁר־רֹמֵ֖שׂ עַל־הָֽאֲדָמָֽה׃

‎9 ‏שְׁנַ֨יִם שְׁנַ֜יִם בָּ֧אוּ אֶל־נֹ֛חַ אֶל־הַתֵּבָ֖ה זָכָ֣ר וּנְקֵבָ֑ה כַּֽאֲשֶׁ֛ר צִוָּ֥ה אֱלֹהִ֖ים אֶת־נֹֽחַ׃

‎10 ‏וַֽיְהִ֖י לְשִׁבְעַ֣ת הַיָּמִ֑ים וּמֵ֣י הַמַּבּ֔וּל הָי֖וּ עַל־הָאָֽרֶץ׃

‎11 ‏בִּשְׁנַ֨ת שֵׁשׁ־מֵא֤וֹת שָׁנָה֙ לְחַיֵּי־נֹ֔חַ בַּחֹ֙דֶשׁ֙ הַשֵּׁנִ֔י בְּשִׁבְעָֽה־עָשָׂ֥ר י֖וֹם לַחֹ֑דֶשׁ בַּיּ֣וֹם הַזֶּ֗ה נִבְקְעוּ֙ כָּֽל־מַעְיְנֹת֙ תְּה֣וֹם רַבָּ֔ה וַאֲרֻבֹּ֥ת הַשָּׁמַ֖יִם נִפְתָּֽחוּ׃

‎12 ‏וַֽיְהִ֥י הַגֶּ֖שֶׁם עַל־הָאָ֑רֶץ אַרְבָּעִ֣ים י֔וֹם וְאַרְבָּעִ֖ים לָֽיְלָה׃

‎13 ‏בְּעֶ֨צֶם הַיּ֤וֹם הַזֶּה֙ בָּ֣א נֹ֔חַ וְשֵׁם־וְחָ֥ם וָיֶ֖פֶת בְּנֵי־נֹ֑חַ וְאֵ֣שֶׁת נֹ֗חַ וּשְׁלֹ֧שֶׁת נְשֵֽׁי־בָנָ֛יו אִתָּ֖ם אֶל־הַתֵּבָֽה׃

‎14 ‏הֵ֜מָּה וְכָל־הַֽחַיָּ֣ה לְמִינָ֗הּ וְכָל־הַבְּהֵמָה֙ לְמִינָ֔הּ וְכָל־הָרֶ֛מֶשׂ הָרֹמֵ֥שׂ עַל־הָאָ֖רֶץ לְמִינֵ֑הוּ וְכָל־הָע֣וֹף לְמִינֵ֔הוּ כֹּ֖ל צִפּ֥וֹר כָּל־כָּנָֽף׃

‎15 ‏וַיָּבֹ֥אוּ אֶל־נֹ֖חַ אֶל־הַתֵּבָ֑ה שְׁנַ֤יִם שְׁנַ֙יִם֙ מִכָּל־הַבָּשָׂ֔ר אֲשֶׁר־בּ֖וֹ ר֥וּחַ חַיִּֽים׃

‎16 ‏וְהַבָּאִ֗ים זָכָ֨ר וּנְקֵבָ֤ה מִכָּל־בָּשָׂר֙ בָּ֔אוּ כַּֽאֲשֶׁ֛ר צִוָּ֥ה אֹת֖וֹ אֱלֹהִ֑ים וַיִּסְגֹּ֥ר יְהוָ֖ה בַּֽעֲדֽוֹ׃

‎17 ‏וַֽיְהִ֧י הַמַּבּ֛וּל אַרְבָּעִ֥ים י֖וֹם עַל־הָאָ֑רֶץ וַיִּרְבּ֣וּ הַמַּ֗יִם וַיִּשְׂאוּ֙ אֶת־הַתֵּבָ֔ה וַתָּ֖רָם מֵעַ֥ל הָאָֽרֶץ׃

‎18 ‏וַיִּגְבְּר֥וּ הַמַּ֛יִם וַיִּרְבּ֥וּ מְאֹ֖ד עַל־הָאָ֑רֶץ וַתֵּ֥לֶךְ הַתֵּבָ֖ה עַל־פְּנֵ֥י הַמָּֽיִם׃

‎19 ‏וְהַמַּ֗יִם גָּ֥בְר֛וּ³ מְאֹ֥ד מְאֹ֖ד עַל־הָאָ֑רֶץ וַיְכֻסּ֗וּ כָּל־הֶֽהָרִים֙ הַגְּבֹהִ֔ים אֲשֶׁר־תַּ֖חַת כָּל־הַשָּׁמָֽיִם׃

‎20 ‏חֲמֵ֨שׁ עֶשְׂרֵ֤ה אַמָּה֙ מִלְמַ֔עְלָה גָּבְר֖וּ הַמָּ֑יִם וַיְכֻסּ֖וּ הֶהָרִֽים׃

‎21 ‏וַיִּגְוַ֞ע כָּל־בָּשָׂ֣ר׀ הָרֹמֵ֣שׂ עַל־הָאָ֗רֶץ בָּע֤וֹף וּבַבְּהֵמָה֙ וּבַ֣חַיָּ֔ה וּבְכָל־הַשֶּׁ֖רֶץ הַשֹּׁרֵ֣ץ עַל־הָאָ֑רֶץ וְכֹ֖ל הָאָדָֽם׃

‎22 ‏כֹּ֡ל אֲשֶׁר֩ נִשְׁמַת־ר֨וּחַ חַיִּ֜ים בְּאַפָּ֗יו מִכֹּ֛ל אֲשֶׁ֥ר בֶּחָֽרָבָ֖ה מֵֽתוּ׃

‎23 ‏וַיִּ֜מַח אֶֽת־כָּל־הַיְק֣וּם׀ אֲשֶׁ֣ר׀ עַל־פְּנֵ֣י הָֽאֲדָמָ֗ה מֵאָדָ֤ם עַד־בְּהֵמָה֙ עַד־רֶ֙מֶשׂ֙ וְעַד־ע֣וֹף הַשָּׁמַ֔יִם וַיִּמָּח֖וּ מִן־הָאָ֑רֶץ וַיִשָּׁ֧אֶר¹ אַךְ־נֹ֛חַ וַֽאֲשֶׁ֥ר אִתּ֖וֹ בַּתֵּבָֽה׃

‎24 ‏וַיִּגְבְּר֥וּ הַמַּ֖יִם עַל־הָאָ֑רֶץ חֲמִשִּׁ֥ים וּמְאַ֖ת יֽוֹם׃

1 wayyō’mer yəhwâ lənōḥa bō’-’atâ wəḵāl-bêṯəḵā ’el-hatēḇâ kî-’ōṯəḵā rā’îṯî ṣadîq ləfānay badwōr hazzeh:

2 mikōl| habəhēmâ haṭṭəhwōrâ tiqq^aḥ-ləḵā šiḇə‘â šiḇə‘â ’îš wə’išətwō ûmin-habəhēmâ ’ăšer lō’ ṭəhōrâ hiw’ šənayim ’îš wə’išətwō:

3 gam mē‘wōf haššāmayim šiḇə‘â šiḇə‘â zāḵār ûnəqēḇâ ləḥayywōṯ zer^a‘ ‘al-pənê ḵāl-hā’āreṣ:

4 kî ləyāmîm ‘wōḏ šiḇə‘â ’ānōḵî maməṭîr ‘al-hā’āreṣ ’arəbā‘îm ywōm wə’arəbā‘îm lāyəlâ ûmāḥîṯî ’eṯ-kāl-hayəqûm ’ăšer ‘āśîṯî mē‘al pənê hā’ăḏāmâ:

5 wayy^a‘aś nōḥa kəḵōl ’ăšer-ṣiûâû yəhwâ:

6 wənōḥa ben-šēš mē’wōṯ šānâ wəhammabûl hāyâ mayim ‘al-hā’āreṣ:

7 wayyāḇō’ nōḥa ûḇānāyw wə’išətwō ûnəšê-ḇānāyw ’itwō ’el-hatēḇâ mipənê mê hammabûl:

8 min-habəhēmâ haṭṭəhwōrâ ûmin-habəhēmâ ’ăšer ’ênennâ ṭəhōrâ ûmin-hā‘wōf wəḵōl ’ăšer-rōmēś ‘al-hā’ăḏāmâ:

9 šənayim šənayim bā’û ’el-nōḥa ’el-hatēḇâ zāḵār ûnəqēḇâ ka’ăšer ṣiûâ ’ĕlōhîm ’eṯ-nōḥa:

10 wayəhî ləšiḇə‘aṯ hayyāmîm ûmê hammabûl hāyû ‘al-hā’āreṣ:

11 bišənaṯ šēš-mē’wōṯ šānâ ləḥayyê-nōḥa b^aḥōḏeš haššēnî bəšiḇə‘â-‘āśār ywōm l^aḥōḏeš bayywōm hazzeh niḇəqə‘û kāl-m^a‘əyənōṯ təhwōm rabâ wa’ărubōṯ haššāmayim nifətāḥû:

12 wayəhî hagešem ‘al-hā’āreṣ ’arəbā‘îm ywōm wə’arəbā‘îm lāyəlâ:

13 bə‘eṣem hayywōm hazzeh bā’ nōḥa wəšēm-wəḥām wāyefeṯ bənê-nōḥa wə’ēšeṯ nōḥa ûšəlōšeṯ nəšê-ḇānāyw ’itām ’el-hatēḇâ:

14 hēmmâ wəḵāl-h^aḥayyâ ləmînāh wəḵāl-habəhēmâ ləmînāh wəḵāl-hāremeś hārōmēś ‘al-hā’āreṣ ləmînēhû wəḵāl-hā‘wōf ləmînēhû kōl ṣipwōr kāl-kānāf:

15 wayyāḇō’û ’el-nōḥa ’el-hatēḇâ šənayim šənayim mikāl-habāśār ’ăšer-bwō rûḥa ḥayyîm:

16 wəhabā’îm zāḵār ûnəqēḇâ mikāl-bāśār bā’û ka’ăšer ṣiûâ ’ōṯwō ’ĕlōhîm wayyisəgōr yəhwâ b^a‘ăḏwō:

17 wayəhî hammabûl ’arəbā‘îm ywōm ‘al-hā’āreṣ wayyirəbû hammayim wayyiśə’û ’eṯ-hatēḇâ watārām mē‘al hā’āreṣ:

18 wayyiḡəbərû hammayim wayyirəbû mə’ōḏ ‘al-hā’āreṣ watēleḵə hatēḇâ ‘al-pənê hammāyim:

19 wəhammayim gāḇərû³ mə’ōḏ mə’ōḏ ‘al-hā’āreṣ wayəḵussû kāl-hehārîm hagəḇōhîm ’ăšer-t^aḥaṯ kāl-haššāmāyim:

20 ḥămēš ‘eśərēh ’ammâ miləm^a‘əlâ gāḇərû hammāyim wayəḵussû hehārîm:

21 wayyiḡəw^a‘ kāl-bāśār| hārōmēś ‘al-hā’āreṣ bā‘wōf ûḇabəhēmâ ûḇ^aḥayyâ ûḇəḵāl-haššereṣ haššōrēṣ ‘al-hā’āreṣ wəḵōl hā’āḏām:

22 kōl ’ăšer nišəmaṯ-rûḥa ḥayyîm bə’apāyw mikōl ’ăšer beḥārāḇâ mēṯû:

23 wayyim^aḥ ’eṯ-kāl-hayəqûm| ’ăšer| ‘al-pənê hā’ăḏāmâ mē’āḏām ‘aḏ-bəhēmâ ‘aḏ-remeś wə‘aḏ-‘wōf haššāmayim wayyimmāḥû min-hā’āreṣ wayiššā’er¹ ’aḵə-nōḥa wa’ăšer ’itwō batēḇâ:

24 wayyiḡəbərû hammayim ‘al-hā’āreṣ ḥămiššîm ûmə’aṯ ywōm: