Numbers (Bemidbar) Chapter 33

‎1 ‏אֵ֜לֶּה מַסְעֵ֣י בְנֵֽי־יִשְׂרָאֵ֗ל אֲשֶׁ֥ר יָצְא֛וּ מֵאֶ֥רֶץ מִצְרַ֖יִם לְצִבְאֹתָ֑ם בְּיַד־מֹשֶׁ֖ה וְאַהֲרֹֽן׃

‎2 ‏וַיִּכְתֹּ֨ב מֹשֶׁ֜ה אֶת־מוֹצָאֵיהֶ֛ם לְמַסְעֵיהֶ֖ם עַל־פִּ֣י יְהוָ֑ה וְאֵ֥לֶּה מַסְעֵיהֶ֖ם לְמוֹצָאֵיהֶֽם׃

‎3 ‏וַיִּסְע֤וּ מֵֽרַעְמְסֵס֙ בַּחֹ֣דֶשׁ הָרִאשׁ֔וֹן³ בַּחֲמִשָּׁ֥ה עָשָׂ֛ר י֖וֹם לַחֹ֣דֶשׁ הָרִאשׁ֑וֹן מִֽמָּחֳרַ֣ת הַפֶּ֗סַח יָצְא֤וּ בְנֵֽי־יִשְׂרָאֵל֙ בְּיָ֣ד רָמָ֔ה לְעֵינֵ֖י כָּל־מִצְרָֽיִם׃

‎4 ‏וּמִצְרַ֣יִם מְקַבְּרִ֗ים אֵת֩ אֲשֶׁ֨ר הִכָּ֧ה יְהוָ֛ה בָּהֶ֖ם כָּל־בְּכ֑וֹר וּבֵאלֹ֣הֵיהֶ֔ם עָשָׂ֥ה יְהוָ֖ה שְׁפָטִֽים׃

‎5 ‏וַיִּסְע֥וּ בְנֵֽי־יִשְׂרָאֵ֖ל מֵרַעְמְסֵ֑ס וַֽיַּחֲנ֖וּ בְּסֻכֹּֽת׃

‎6 ‏וַיִּסְע֖וּ מִסֻּכֹּ֑ת וַיַּחֲנ֣וּ בְאֵתָ֔ם אֲשֶׁ֖ר בִּקְצֵ֥ה הַמִּדְבָּֽר׃

‎7 ‏וַיִּסְעוּ֙ מֵֽאֵתָ֔ם וַיָּ֙שָׁב֙ עַל־פִּ֣י הַחִירֹ֔ת אֲשֶׁ֥ר עַל־פְּנֵ֖י בַּ֣עַל צְפ֑וֹן וַֽיַּחֲנ֖וּ לִפְנֵ֥י מִגְדֹּֽל׃

‎8 ‏וַיִּסְעוּ֙ מִפְּנֵ֣י הַֽחִירֹ֔ת וַיַּֽעַבְר֥וּ בְתוֹךְ־הַיָּ֖ם הַמִּדְבָּ֑רָה וַיֵּ֨לְכ֜וּ דֶּ֣רֶךְ שְׁלֹ֤שֶׁת יָמִים֙ בְּמִדְבַּ֣ר אֵתָ֔ם וַֽיַּחֲנ֖וּ בְּמָרָֽה׃

‎9 ‏וַיִּסְעוּ֙ מִמָּרָ֔ה וַיָּבֹ֖אוּ אֵילִ֑מָה וּ֠בְאֵילִם שְׁתֵּ֣ים עֶשְׂרֵ֞ה עֵינֹ֥ת מַ֛יִם וְשִׁבְעִ֥ים תְּמָרִ֖ים וַיַּחֲנוּ־שָֽׁם׃

‎10 ‏וַיִּסְע֖וּ מֵאֵילִ֑ם וַֽיַּחֲנ֖וּ עַל־יַם־סֽוּף׃

‎11 ‏וַיִּסְע֖וּ מִיַּם־ס֑וּף וַֽיַּחֲנ֖וּ בְּמִדְבַּר־סִֽין׃

‎12 ‏וַיִּסְע֖וּ מִמִּדְבַּר־סִ֑ין וַֽיַּחֲנ֖וּ בְּדָפְקָֽה׃

‎13 ‏וַיִּסְע֖וּ מִדָּפְקָ֑ה וַֽיַּחֲנ֖וּ בְּאָלֽוּשׁ׃

‎14 ‏וַיִּסְע֖וּ מֵאָל֑וּשׁ וַֽיַּחֲנוּ֙ בִּרְפִידִ֔ם וְלֹא־הָ֨יָה שָׁ֥ם מַ֛יִם לָעָ֖ם לִשְׁתּֽוֹת׃

‎15 ‏וַיִּסְע֖וּ מֵרְפִידִ֑ם וַֽיַּחֲנ֖וּ בְּמִדְבַּ֥ר סִינָֽי׃

‎16 ‏וַיִּסְע֖וּ מִמִּדְבַּ֣ר סִינָ֑י וַֽיַּחֲנ֖וּ בְּקִבְרֹ֥ת הַֽתַּאֲוָֽה׃

‎17 ‏וַיִּסְע֖וּ מִקִּבְרֹ֣ת הַֽתַּאֲוָ֑ה וַֽיַּחֲנ֖וּ בַּחֲצֵרֹֽת׃

‎18 ‏וַיִּסְע֖וּ מֵחֲצֵרֹ֑ת וַֽיַּחֲנ֖וּ בְּרִתְמָֽה׃

‎19 ‏וַיִּסְע֖וּ מֵרִתְמָ֑ה וַֽיַּחֲנ֖וּ בְּרִמֹּ֥ן פָּֽרֶץ׃

‎20 ‏וַיִּסְע֖וּ מֵרִמֹּ֣ן פָּ֑רֶץ וַֽיַּחֲנ֖וּ בְּלִבְנָֽה׃

‎21 ‏וַיִּסְע֖וּ מִלִּבְנָ֑ה וַֽיַּחֲנ֖וּ בְּרִסָּֽה׃

‎22 ‏וַיִּסְע֖וּ מֵרִסָּ֑ה וַֽיַּחֲנ֖וּ בִּקְהֵלָֽתָה׃

‎23 ‏וַיִּסְע֖וּ מִקְּהֵלָ֑תָה וַֽיַּחֲנ֖וּ בְּהַר־שָֽׁפֶר׃

‎24 ‏וַיִּסְע֖וּ מֵֽהַר־שָׁ֑פֶר וַֽיַּחֲנ֖וּ בַּחֲרָדָֽה׃

‎25 ‏וַיִּסְע֖וּ מֵחֲרָדָ֑ה וַֽיַּחֲנ֖וּ בְּמַקְהֵלֹֽת׃

‎26 ‏וַיִּסְע֖וּ מִמַּקְהֵלֹ֑ת וַֽיַּחֲנ֖וּ בְּתָֽחַת׃

‎27 ‏וַיִּסְע֖וּ מִתָּ֑חַת וַֽיַּחֲנ֖וּ בְּתָֽרַח׃

‎28 ‏וַיִּסְע֖וּ מִתָּ֑רַח וַֽיַּחֲנ֖וּ בְּמִתְקָֽה׃

‎29 ‏וַיִּסְע֖וּ מִמִּתְקָ֑ה וַֽיַּחֲנ֖וּ בְּחַשְׁמֹנָֽה׃

‎30 ‏וַיִּסְע֖וּ מֵֽחַשְׁמֹנָ֑ה וַֽיַּחֲנ֖וּ בְּמֹסֵרֽוֹת׃

‎31 ‏וַיִּסְע֖וּ מִמֹּסֵר֑וֹת וַֽיַּחֲנ֖וּ בִּבְנֵ֥י יַעֲקָֽן׃

‎32 ‏וַיִּסְע֖וּ מִבְּנֵ֣י יַעֲקָ֑ן וַֽיַּחֲנ֖וּ בְּחֹ֥ר הַגִּדְגָּֽד׃

‎33 ‏וַיִּסְע֖וּ מֵחֹ֣ר הַגִּדְגָּ֑ד וַֽיַּחֲנ֖וּ בְּיָטְבָֽתָה׃

‎34 ‏וַיִּסְע֖וּ מִיָּטְבָ֑תָה וַֽיַּחֲנ֖וּ בְּעַבְרֹנָֽה׃

‎35 ‏וַיִּסְע֖וּ מֵֽעַבְרֹנָ֑ה וַֽיַּחֲנ֖וּ בְּעֶצְי֥וֹן גָּֽבֶר׃

‎36 ‏וַיִּסְע֖וּ מֵעֶצְי֣וֹן גָּ֑בֶר וַיַּחֲנ֥וּ בְמִדְבַּר־צִ֖ן הִ֥וא קָדֵֽשׁ׃

‎37 ‏וַיִּסְע֖וּ מִקָּדֵ֑שׁ וַֽיַּחֲנוּ֙ בְּהֹ֣ר הָהָ֔ר בִּקְצֵ֖ה אֶ֥רֶץ אֱדֽוֹם׃

‎38 ‏וַיַּעַל֩ אַהֲרֹ֨ן הַכֹּהֵ֜ן אֶל־הֹ֥ר הָהָ֛ר עַל־פִּ֥י יְהוָ֖ה וַיָּ֣מָת שָׁ֑ם בִּשְׁנַ֣ת הָֽאַרְבָּעִ֗ים לְצֵ֤את בְּנֵֽי־יִשְׂרָאֵל֙ מֵאֶ֣רֶץ מִצְרַ֔יִם בַּחֹ֥דֶשׁ הַחֲמִישִׁ֖י בְּאֶחָ֥ד לַחֹֽדֶשׁ׃

‎39 ‏וְאַהֲרֹ֔ן בֶּן־שָׁלֹ֧שׁ וְעֶשְׂרִ֛ים וּמְאַ֖ת שָׁנָ֑ה בְּמֹת֖וֹ בְּהֹ֥ר הָהָֽר׃ ס

‎40 ‏וַיִּשְׁמַ֗ע הַֽכְּנַעֲנִי֙ מֶ֣לֶךְ עֲרָ֔ד וְהֽוּא־יֹשֵׁ֥ב בַּנֶּ֖גֶב בְּאֶ֣רֶץ כְּנָ֑עַן בְּבֹ֖א בְּנֵ֥י יִשְׂרָאֵֽל׃

‎41 ‏וַיִּסְע֖וּ מֵהֹ֣ר הָהָ֑ר וַֽיַּחֲנ֖וּ בְּצַלְמֹנָֽה׃

‎42 ‏וַיִּסְע֖וּ מִצַּלְמֹנָ֑ה וַֽיַּחֲנ֖וּ בְּפוּנֹֽן׃

‎43 ‏וַיִּסְע֖וּ מִפּוּנֹ֑ן וַֽיַּחֲנ֖וּ בְּאֹבֹֽת׃

‎44 ‏וַיִּסְע֖וּ מֵאֹבֹ֑ת וַֽיַּחֲנ֛וּ בְּעִיֵּ֥י הָעֲבָרִ֖ים בִּגְב֥וּל מוֹאָֽב׃

‎45 ‏וַיִּסְע֖וּ מֵעִיִּ֑ים וַֽיַּחֲנ֖וּ בְּדִיבֹ֥ן גָּֽד׃

‎46 ‏וַיִּסְע֖וּ מִדִּיבֹ֣ן גָּ֑ד וַֽיַּחֲנ֖וּ בְּעַלְמֹ֥ן דִּבְלָתָֽיְמָה׃

‎47 ‏וַיִּסְע֖וּ מֵעַלְמֹ֣ן דִּבְלָתָ֑יְמָה וַֽיַּחֲנ֛וּ בְּהָרֵ֥י הָעֲבָרִ֖ים לִפְנֵ֥י נְבֽוֹ׃

‎48 ‏וַיִּסְע֖וּ מֵהָרֵ֣י הָעֲבָרִ֑ים וַֽיַּחֲנוּ֙ בְּעַֽרְבֹ֣ת מוֹאָ֔ב עַ֖ל יַרְדֵּ֥ן יְרֵחֽוֹ׃

‎49 ‏וַיַּחֲנ֤וּ עַל־הַיַּרְדֵּן֙ מִבֵּ֣ית הַיְשִׁמֹ֔ת עַ֖ד אָבֵ֣ל הַשִּׁטִּ֑ים בְּעַֽרְבֹ֖ת מוֹאָֽב׃ ס

‎50 ‏וַיְדַבֵּ֧ר יְהוָ֛ה אֶל־מֹשֶׁ֖ה בְּעַֽרְבֹ֣ת מוֹאָ֑ב עַל־יַרְדֵּ֥ן יְרֵח֖וֹ לֵאמֹֽר׃

‎51 ‏דַּבֵּר֙ אֶל־בְּנֵ֣י יִשְׂרָאֵ֔ל וְאָמַרְתָּ֖ אֲלֵהֶ֑ם כִּ֥י אַתֶּ֛ם עֹבְרִ֥ים אֶת־הַיַּרְדֵּ֖ן אֶל־אֶ֥רֶץ כְּנָֽעַן׃

‎52 ‏וְה֨וֹרַשְׁתֶּ֜ם אֶת־כָּל־יֹשְׁבֵ֤י הָאָ֙רֶץ֙ מִפְּנֵיכֶ֔ם וְאִ֨בַּדְתֶּ֔ם אֵ֖ת כָּל־מַשְׂכִּיֹּתָ֑ם וְאֵ֨ת כָּל־צַלְמֵ֤י מַסֵּֽכֹתָם֙ תְּאַבֵּ֔דוּ וְאֵ֥ת כָּל־בָּמֹתָ֖ם תַּשְׁמִֽידוּ׃

‎53 ‏וְהוֹרַשְׁתֶּ֥ם אֶת־הָאָ֖רֶץ וִֽישַׁבְתֶּם־בָּ֑הּ כִּ֥י לָכֶ֛ם נָתַ֥תִּי אֶת־הָאָ֖רֶץ לָרֶ֥שֶׁת אֹתָֽהּ׃

‎54 ‏וְהִתְנַחַלְתֶּם֩ אֶת־הָאָ֨רֶץ בְּגוֹרָ֜ל לְמִשְׁפְּחֹֽתֵיכֶ֗ם לָרַ֞ב תַּרְבּ֤וּ אֶת־נַחֲלָתוֹ֙ וְלַמְעַט֙ תַּמְעִ֣יט אֶת־נַחֲלָת֔וֹ אֶל֩ אֲשֶׁר־יֵ֨צֵא ל֥וֹ שָׁ֛מָּה הַגּוֹרָ֖ל ל֣וֹ יִהְיֶ֑ה לְמַטּ֥וֹת אֲבֹתֵיכֶ֖ם תִּתְנֶחָֽלוּ׃

‎55 ‏וְאִם־לֹ֨א תוֹרִ֜ישׁוּ אֶת־יֹשְׁבֵ֣י הָאָרֶץ֮ מִפְּנֵיכֶם֒ וְהָיָה֙ אֲשֶׁ֣ר תּוֹתִ֣ירוּ מֵהֶ֔ם לְשִׂכִּים֙ בְּעֵ֣ינֵיכֶ֔ם וְלִצְנִינִ֖ם בְּצִדֵּיכֶ֑ם וְצָרֲר֣וּ אֶתְכֶ֔ם עַל־הָאָ֕רֶץ אֲשֶׁ֥ר אַתֶּ֖ם יֹשְׁבִ֥ים בָּֽהּ׃

‎56 ‏וְהָיָ֗ה כַּאֲשֶׁ֥ר דִּמִּ֛יתִי לַעֲשׂ֥וֹת לָהֶ֖ם אֶֽעֱשֶׂ֥ה לָכֶֽם׃ פ

1 ’ēlleh masə‘ê ḇənê-yiśərā’ēl ’ăšer yāṣə’û mē’ereṣ miṣərayim ləṣiḇə’ōṯām bəyaḏ-mōšeh wə’ahărōn:

2 wayyiḵətōḇ mōšeh ’eṯ-mwōṣā’êhem ləmasə‘êhem ‘al-pî yəhwâ wə’ēlleh masə‘êhem ləmwōṣā’êhem:

3 wayyisə‘û mēr^a‘əməsēs b^aḥōḏeš hāri’šwōn³ b^aḥămiššâ ‘āśār ywōm l^aḥōḏeš hāri’šwōn mimmāḥŏraṯ hapes^aḥ yāṣə’û ḇənê-yiśərā’ēl bəyāḏ rāmâ lə‘ênê kāl-miṣərāyim:

4 ûmiṣərayim məqabərîm ’ēṯ ’ăšer hikâ yəhwâ bâem kāl-bəḵwōr ûḇē’lōhêhem ‘āśâ yəhwâ šəfāṭîm:

5 wayyisə‘û ḇənê-yiśərā’ēl mēr^a‘əməsēs wayy^aḥănû bəsukōṯ:

6 wayyisə‘û missukōṯ wayy^aḥănû ḇə’ēṯām ’ăšer biqəṣēh hammiḏəbār:

7 wayyisə‘û mē’ēṯām wayyāšāḇ ‘al-pî h^aḥîrōṯ ’ăšer ‘al-pənê b^a‘al ṣəfwōn wayy^aḥănû lifənê miḡədōl:

8 wayyisə‘û mipənê h^aḥîrōṯ wayy^a‘aḇərû ḇəṯwōḵə-hayyām hammiḏəbārâ wayyēləḵû dereḵə šəlōšeṯ yāmîm bəmiḏəbar ’ēṯām wayy^aḥănû bəmārâ:

9 wayyisə‘û mimmārâ wayyāḇō’û ’êlimâ ûḇə’êlim šətêm ‘eśərēh ‘ênōṯ mayim wəšiḇə‘îm təmārîm wayy^aḥănû-šām:

10 wayyisə‘û mē’êlim wayy^aḥănû ‘al-yam-sûf:

11 wayyisə‘û mîyam-sûf wayy^aḥănû bəmiḏəbar-sîn:

12 wayyisə‘û mimmiḏəbar-sîn wayy^aḥănû bəḏāfəqâ:

13 wayyisə‘û midāfəqâ wayy^aḥănû bə’ālûš:

14 wayyisə‘û mē’ālûš wayy^aḥănû birəfîḏim wəlō’-hāyâ šām mayim lā‘ām lišətwōṯ:

15 wayyisə‘û mērəfîḏim wayy^aḥănû bəmiḏəbar sînāy:

16 wayyisə‘û mimmiḏəbar sînāy wayy^aḥănû bəqiḇərōṯ hata’ăwâ:

17 wayyisə‘û miqqiḇərōṯ hata’ăwâ wayy^aḥănû b^aḥăṣērōṯ:

18 wayyisə‘û mēḥăṣērōṯ wayy^aḥănû bəriṯəmâ:

19 wayyisə‘û mēriṯəmâ wayy^aḥănû bərimmōn pāreṣ:

20 wayyisə‘û mērimmōn pāreṣ wayy^aḥănû bəliḇənâ:

21 wayyisə‘û milliḇənâ wayy^aḥănû bərissâ:

22 wayyisə‘û mērissâ wayy^aḥănû biqəhēlāṯâ:

23 wayyisə‘û miqqəhēlāṯâ wayy^aḥănû bəhar-šāfer:

24 wayyisə‘û mēhar-šāfer wayy^aḥănû b^aḥărāḏâ:

25 wayyisə‘û mēḥărāḏâ wayy^aḥănû bəmaqəhēlōṯ:

26 wayyisə‘û mimmaqəhēlōṯ wayy^aḥănû bəṯāḥaṯ:

27 wayyisə‘û mitāḥaṯ wayy^aḥănû bəṯār^aḥ:

28 wayyisə‘û mitār^aḥ wayy^aḥănû bəmiṯəqâ:

29 wayyisə‘û mimmiṯəqâ wayy^aḥănû bəḥašəmōnâ:

30 wayyisə‘û mēḥašəmōnâ wayy^aḥănû bəmōsērwōṯ:

31 wayyisə‘û mimmōsērwōṯ wayy^aḥănû biḇənê y^a‘ăqān:

32 wayyisə‘û mibənê y^a‘ăqān wayy^aḥănû bəḥōr hagiḏəgāḏ:

33 wayyisə‘û mēḥōr hagiḏəgāḏ wayy^aḥănû bəyāṭəḇāṯâ:

34 wayyisə‘û mîyāṭəḇāṯâ wayy^aḥănû bə‘aḇərōnâ:

35 wayyisə‘û mē‘aḇərōnâ wayy^aḥănû bə‘eṣəywōn gāḇer:

36 wayyisə‘û mē‘eṣəywōn gāḇer wayy^aḥănû ḇəmiḏəbar-ṣin hiw’ qāḏēš:

37 wayyisə‘û miqqāḏēš wayy^aḥănû bəhōr hâār biqəṣēh ’ereṣ ’ĕḏwōm:

38 wayy^a‘al ’ahărōn hakōhēn ’el-hōr hâār ‘al-pî yəhwâ wayyāmāṯ šām bišənaṯ hā’arəbā‘îm ləṣē’ṯ bənê-yiśərā’ēl mē’ereṣ miṣərayim b^aḥōḏeš h^aḥămîšî bə’eḥāḏ l^aḥōḏeš:

39 wə’ahărōn ben-šālōš wə‘eśərîm ûmə’aṯ šānâ bəmōṯwō bəhōr hâār: s

40 wayyišəm^a‘ hakən^a‘ănî meleḵə ‘ărāḏ wəhû’-yōšēḇ banneḡeḇ bə’ereṣ kənā‘an bəḇō’ bənê yiśərā’ēl:

41 wayyisə‘û mēhōr hâār wayy^aḥănû bəṣaləmōnâ:

42 wayyisə‘û miṣṣaləmōnâ wayy^aḥănû bəfûnōn:

43 wayyisə‘û mipûnōn wayy^aḥănû bə’ōḇōṯ:

44 wayyisə‘û mē’ōḇōṯ wayy^aḥănû bə‘îyê hā‘ăḇārîm biḡəḇûl mwō’āḇ:

45 wayyisə‘û mē‘îyîm wayy^aḥănû bəḏîḇōn gāḏ:

46 wayyisə‘û midîḇōn gāḏ wayy^aḥănû bə‘aləmōn diḇəlāṯāyəmâ:

47 wayyisə‘û mē‘aləmōn diḇəlāṯāyəmâ wayy^aḥănû bəhārê hā‘ăḇārîm lifənê nəḇwō:

48 wayyisə‘û mēhārê hā‘ăḇārîm wayy^aḥănû bə‘arəḇōṯ mwō’āḇ ‘al yarədēn yərēḥwō:

49 wayy^aḥănû ‘al-hayyarədēn mibêṯ hayəšimōṯ ‘aḏ ’āḇēl haššiṭṭîm bə‘arəḇōṯ mwō’āḇ: s

50 wayəḏabēr yəhwâ ’el-mōšeh bə‘arəḇōṯ mwō’āḇ ‘al-yarədēn yərēḥwō lē’mōr:

51 dabēr ’el-bənê yiśərā’ēl wə’āmarətā ’ălēhem kî ’atem ‘ōḇərîm ’eṯ-hayyarədēn ’el-’ereṣ kənā‘an:

52 wəhwōrašətem ’eṯ-kāl-yōšəḇê hā’āreṣ mipənêḵem wə’ibaḏətem ’ēṯ kāl-maśəkîyōṯām wə’ēṯ kāl-ṣaləmê massēḵōṯām tə’abēḏû wə’ēṯ kāl-bāmōṯām tašəmîḏû:

53 wəhwōrašətem ’eṯ-hā’āreṣ wîšaḇətem-bāh kî lāḵem nāṯatî ’eṯ-hā’āreṣ lārešeṯ ’ōṯāh:

54 wəhiṯən^aḥalətem ’eṯ-hā’āreṣ bəḡwōrāl ləmišəpəḥōṯêḵem lāraḇ tarəbû ’eṯ-n^aḥălāṯwō wəlamə‘aṭ tamə‘îṭ ’eṯ-n^aḥălāṯwō ’el ’ăšer-yēṣē’ lwō šāmmâ hagwōrāl lwō yihəyeh ləmaṭṭwōṯ ’ăḇōṯêḵem tiṯəneḥālû:

55 wə’im-lō’ ṯwōrîšû ’eṯ-yōšəḇê hā’āreṣ mipənêḵem wəhāyâ ’ăšer twōṯîrû mēhem ləśikîm bə‘ênêḵem wəliṣənînim bəṣidêḵem wəṣārărû ’eṯəḵem ‘al-hā’āreṣ ’ăšer ’atem yōšəḇîm bāh:

56 wəhāyâ ka’ăšer dimmîṯî l^a‘ăśwōṯ lâem ’e‘ĕśeh lāḵem: f